Tuesday, June 12, 2007

هل تحب السفر الى اسرائيل؟ (اوعى تقول ايون)


خير اللهم اجعله خير قريت مقال مجدي مهنا (فى الممنوع) فى جرنان المصرى اليوم بتاريخ8 يونيو 2007 يوم الجمعة

المقال بيقول ايه بقى

علي موقع «بص وطل» الإلكتروني، الذي تشرف عليه الدكتورة آمال أبو الفضل، الأستاذة بجامعة الإسكندرية، طرح هذا السؤال: هل تحب السفر إلي إسرائيل؟..

وكانت إجابات الشباب علي الموقع كالآتي

وليد عمران: بجد عاوز واحد عقلاني يرد علي السؤال ده: مين يحب يسافر إنجلترا؟ أكيد كلكم.. طيب إيه الفرق بينها وبين إسرائيل؟ والله إحنا لو شايفين الخير في بلدنا، ماكناش فكرنا نشتغل في إسرائيل.. وإحنا شايفين كل المسئولين في البلد ماشيين علي حل شعرهم.. اللي عايش في شرم الشيخ.. واللي عنده قصور في ٦ أكتوبر.. وغيره وغيره.
هبهوبة: فعلاً شكل العلم الإسرائيلي مستفز.. ومهما كانت الصعوبات اللي في مصر.. ده لا يبرر أبداً السفر إلي إسرائيل.
نصر: أنا مش مصدق الموضوع ده من أصله.. معقول فيه شباب بيفكر يروح إسرائيل؟
نور حسنين: أنا من المنصورة.. وهي معروفة بكثرة أبنائها اللي بيسافروا لإسرائيل، والغريب أن هؤلاء الشباب عندما يعودون إلي مصر بيشوفوا الويل من مباحث أمن الدولة.. بصراحة مش عارفين مين السبب.. يا تري الحكومة التي قهرت الشباب ودفعته إلي قبول الذل لهذه الدرجة، أم أن الشباب أصبح عندهم هوس بالفلوس وبالحرية الجنسية المباحة في إسرائيل؟ ورأيي أن السلام بيننا وبين إسرائيل هو سلام سياسي فقط.. بمعني سلام قائم علي الورق فقط.
ميجو: بص يا باشا، بجد مش فارقة، وأنا أعرف واحد صاحبي عملها وسافر إلي إسرائيل، بس نعمل إيه، فعلاً إحنا معدش لينا عيش هنا، وعلي فكرة إسرائيل فعلاً تحب المصريين، ولو كان عندهم فرصة عمل لي، مش هتردد لحظة إني أروح هناك، بس علي شرط إني ماخونش بلدي خالص وينسوا إني مصري.
إبراهيم: أيوه عايز أسافر إسرائيل.. البلد بقت زي الزفت.
دكتورة أسنان: أنا مش مستغربة من الموضوع، أنا مستغربة ومذهولة من التعليقات، إزاى الشباب مابقاش همه ومستعد يشتغل في إسرائيل.. خلاص نسيوا التاريخ؟
حسن جاد المولي: الوجود في بلاد الفرنجة ليس بحرام ولا عيب، وغسل الصحون والبلاط ليس عاراً علي صاحبه، ولا يوجد مصري في تل أبيب جاسوس.. أخوك حسن جاد المولي، مصري مقيم في تل أبيب.

أحمد سعيد عبد العزيز: مهما كانت الأوضاع في البلد، فهذا ليس مبرراً للسفر إلي إسرائيل، لأنها العدو الأول للعرب وللمسلمين

مني: أنا عينيه دمعت، أنا عندي أموت في بلدي ولا أكون أميرة في بلد تانية.. بلدك وناسك وأهلك وحبايبك وعمرك كله، حسوا بقي.. حرام

.
سارة: أكرم كتير للمصريين اللي مش لاقيين شغل خالص في مصر، إنهم يسافروا إسرائيل ويشتغلوا مهن درجة ثالثة، واللي يخليهم ما يمسحوش بلاط في بلدهم ويروحوا يمسحوه لليهود، هو سبب بسيط، إنهم بيخدموا أغراب، بعدما أصبحنا كمصريين منبوذين.
ريكو: اللي خدته القرعة تاخده أم الشعور.
محمود فتحي: اعذروني أنا والشباب، هنعمل إيه؟ مش لاقيين حد يكلمنا ولا يسمعنا ولا شغل، والدولة إيدك منها والقبر.
أزموس: أنا يا جماعة بصراحة مسافر إسرائيل، وظروفي إني رايح إسرائيل زيارة لخطيبتي الفلسطينية اللي عايشة في القدس، وعفواً هناك في إسرائيل رقم رسمي يشير إلي أن هناك ٣٠ ألف شاب مصري يعملون في إسرائيل، وأنا لما أخلص دراستي نفسي أسافر هناك، خصوصاً إني أسمع أنهم بيحبوا المصريين، وبصراحة كده بيكرهوا العرب والفلسطينيين.
عماد عثمان: إسرائيل ليست جنة ولا حاجة، والبطالة فيها أصبحت بنسبة مرتفعة، والدولة بتقول محدش يسافر، والناس برضه تسافر غصب عن الدولة.
.. غداً نطرح سؤالا آخر وتعليقات الشباب علي قضية الجاسوس محمد سيد صابر، الموظف بهيئة الطاقة الذرية.



بالامانة انا كنت بقرأ المقالة وانا بضحك بس بعد كده قعدت مذهولة شوية كده ومندهشة من الردود حسيت ان مصر كلها مسافرة اسرائيل ومش هيبقى فى زحمة تانى فى البلد والدنيا هتزهزة وان اسرائيل كده بقيت بالنسبالنا زى ليبيا كده نروح نشتغل شهرين ونعمل قرشين ونرجع واننا بقينا زى السمن على العسل وانى ممكن اصاحب ناس اسرائيلين واعزمهم على العشا فى بحرى خلاص بقى مهى زاطط


لا وايه مش بس كده بما اننا هنروح هناك بقى اسرائيل ونشتغل عندهم نعملنا جالية هناك او نعمل لوبى مصرى ونكتر كده ونبقى اغلبية ونسيطر على اقتصادهم ومش بعيد تحصل معجزة واحنا اللى نحتلهم وناخد اللى بيقولوا عليها اسرائيل منهم ونبقى احنا الاحتلال

هههههههه ساعتها هيطفشوا ويسبوها ومش بعيد هما اللى يجوا مصر

انا بجد حزينة لحالة اللامبالاة اللى بقيت عند مش هاقول معظم انما بعض الشباب اللى بس مش هيعمل كده لا حتى اللى خانة تفكيرة وبيفكر يعمل كده لا دا المصيبة ان فى ناس متفشخرة اوى انها مقيمة فى تل ابيب تقولش قاعدين فى جنة الخلد(اللهم لا اعتراض)

مفيش حد مثالى وانا مش مثالية ولا بقول نبقى مثاليين احنا بشر والانسان نصين ملاك وشيطان بس واجبنا اننا نقف جمب البلد دى مش نروح نشتغل عندألد اعدائنا هوا اه مخدناش حاجة مفيدة اوى تعليم واكل وشرب بايظ وشغل مفيش بس نعمل بشوية الحاجات دى شوية انتماء

دا لو واحد اسرائيلى هوا اللى بيتسأل مش هيعلق التعليقات المخجلة دى

18 comments:

vetrinary said...

لو لم اكن مصريا لوددت ان اكون فرنسيا

عجبنى اوى قصايد سعاد صباح

هى فعلا بتكتب زى نزار

بس هى فعلا شاعرة من النوع (الحريمى)بس عادى

متشكرين لاسكندريه عشان خاطرك

محمود على said...

انا مروحش اسرائيل
عشان كل اهلها هيكونوا بيكرهوني
بس ده ميمنعش انها دوله رائيس وزراها ممكن بتحاكم علشان غلط وده مبيحصلش في كل الدول العربيه
وده معناه انها دوله ديموقراطيه

ست ابوها said...

vetrinary شكرا على مرورك على المدونة واشمعنى يعنى فرنساوى
ونزار بردك كان شاعر المرأة ومش معقول واحدة ست هتكتب شعر مفيهوش شىء للمرأة يعنى اشمعنى الرجالة بيكتبوا عنا



للاسف يا أستاذ محمود ان اسرائيل دولة ديمقراطية وده اللى مش موجو فى الدول العربية وحاجات تانية كتير

mohamed kamal said...

اريد ان اسافر الى اسرئيل مقاتل
ولو لم اكن عربيا لوددت ان اكون عربيا.....مصريا....اسكندرانى
ومع تمنياتى بالنجاح الدائم
من مملكتى خيال الظل ....الى امبراطورية اسكندرانية طرح البحر

ست ابوها said...

شكرا على مرورك على المدونة يا كمال
ويارب نلحق نروح مقاتلين فى جيلنا مش كمان خمس ست اجيال قدام لان حال الدول العربية لا يسر عدو ولا حبيب

وجع دماغ said...

مشكلة الأنتماء مش مشكلة الشباب وبس
لأن حب البلد علاقة من طرفين
ومصر مش هيه اللى قسيت على ولادها وخلتهم بالشكل ده
مصر كأنها مخطوفة فى أدين عصابة بتنهبها ومش مخلياها تدى حاجة لولادها
وعشان كدة بقى حب البلد مشكلة

ست ابوها said...

يا استاذ سعد بس مش نروح اسرائيل يعنى مش للدرجة اكيد فى اى حتة تانيةالمبالغ والمرتبات اعلى بس اعتقد اننا بنشتغل بره مصر بضمير اكتر من جوه مصر
اكيد يا وجع دماغ حب البلد مشكلة لان الناس حاسة انها بتدى بس مابتخدش فى المقابل

Unknown said...

ياخبر أبيض
أنا أروح اسرائيل؟
ده لو أنا حتي باشحت في بلدي هنا ماروحش اسرائيل
ده أنا لما بتيجي سيرة اني ممكن أسافر أمريكا جسمي بيقشعر
أمال اسرائيل
البهدلة في بلدنا أكرملنا في الأول وفي الآخر هي بلدنا تعمل اللي هي عايزاه فينا
ولو هيدوني ايه في اسرائيل ماروحش

ما علينا said...

بغض النظر عن اي شيء
وعن الفساد والدكتاتورية اللي احنا بنعاني منها
والديمقراطية اللي عندهم

كان في احساس واحد مسيطر على
كان نفسي يدي تنزل على بلطمة قوية مدوية
على كل واحد قال ان نفسه يسافر اسرائيل

شيء مقزز
والاغرب اللي يقولك دول بيحبوا المصريين
هم معاتيه دول ولا ايه
بصراحة
عمري ما قرات حاجة وضايقتني واستفزتني زي ردود الشباب دول
حسبي الله ونعم الوكيل

واللي بيقول ان الحياة هناك مش حرام ولا عيب
لا يا سيدي
الحياة بين ظهراني الكفر حرام طالما انك مش مضطر
وما حدش يقولي مضطر علشان الشغل والكلام دا كله
المضطر دا يعني خلاص مش لاقي قوت يومه

حقيقي البوست جامد جدا

Jobove - Reus said...

please visit, thank

moneer said...

انا ممكن اروح سياحه على اساس انها فى الاصل ارض عربيه
بس انى اشتغل هناك ده صعب
ولا ايه؟

ست ابوها said...

فنانة فقيرة وماعلينا
Té la mà Maria
moneerشكرا لشعوركم اللى بينم عن احساس كل مصرى محترم

ابن مصر said...

اولا ...انتي من باكوس برضه يا دي النيله داحنا كترنا بقي علي النت ومفروض نعمل جمعية واقبضها انا الاول
ثانيا...مالها اسرائيل؟؟؟ في معاهدة سلام بنا وبنهم... احنا بنكرهم ليه؟؟ بتقولي علشان الحروب اللي خسارناها..طب ايه يعني مالمانيا وفرنسا كان بيهم دايما حروب وروسيا والمانيا كان بينهم حروب ..المانيا النازية قتلت اكتر من مليون روسي في الحرب العالمية التانية لكن بينهم الان تعاون وسلام ...احنا ليه عندنا ابيض ولا اسود دا في مليون لون في النص ليه مش بنفكر بالعقل ؟هل كل الناس هنالك ملايكة ..لاطبعا ..بس احنا مفروض نمد ايدينا لاهل السلام... قابلت منهم ناس هنا في امريكا منهم كان بيتكلم عربي احسن مني وبيحبوا الاكل والغنا المصري ومنهم كان عايز ضرب الجزم.......الخلاصة مافيش حاجة مطلقة مفروض نعامل الناس بنفس الطريقة اللي بيعاملونا بيها..

ست ابوها said...

اولا اهلا بيك يا ابن مصر وابن باكوس بردك
ثانيا انا مش مقتنعة ان فىمعاهدة سلام بينا وبين اسرائيل ودى وجهة نظرى ومش شايفةانهم بيمدوا ديهم بالسلام عشان نمدهلهم وانهم بيتكلموا عربى اكيد طبعا انه يعرف لغة عدوه وانهم بيحبوا الغنا ولاكل المصرى دا شىء وانهم يحبونا احنا شىء اخر وانا شايفة انهم مازلوا بتعاملوا معانا من منطق الند بالند مش بيدونا اللقمة اللى فة بقهم مثلا او فرشلنا الاض رمل بدليل قتلهم للعساكر على الحدود ويقولك غلطة والاختلاف فى الرأى لا يفسد للود قضية

Classic Games said...

مصري وأفتخر
ولو لم أكنت مصريا لوددت ان اكون مصرياً
مش معني ان في مشاكل في بلدي إني اكرهها مفيش دولة علي مستوي العالم مفيهاش مشاكل حب مصر بيجري في دمنا كلنا من اصغر واحد لاكبر واحد واللي بيقولوا اسافروا اسرائيل ميستحقوش يشموا هواء في مصر

Anonymous said...

بسم الله الرحمن الرحيم احسن كلمه ابدأ بيها كلامى
اولا مع كل احترامى للاخوه والاخوات الى فى المنتدى انا عايز اسأل يعنى اشمعنى اسرائيل بالذات مسافرهاش هتقولى انت واشمعنى اسرائيل بالذات تسافرها اقولك انا ليه اسرائيل بالذات اسافرها
عايزنى اسافر فين يعنى السعوديه ولا الكويت عايزلى اقل حاجه 15 20 الف جنيه علشان اسافر وحتى لما اسافر ياترى هشتغل ولا مش هلاقى شغل وحتى لو لقيت شغل هيعاملونى على اساس انى عبد عندهم ودا الى بيحصل حتى كمان عاملنها قانونى ان دا سيدك وكدا واحنا بنحسن صوره السيد بالعبد بنقول عليهم الكفيل السعودى مثلا ودا طبعا مش كفيلك دا سيدك طيب هروح فين كل الدول العربيه بنفس النظام طيب والدول الاجنبيه اقل دوله زى ايطاليا مثلا الى بيقولو عليها فلاحين اوروبا عايزلى اقل حاجه 80 الف جنيه دا علشان اروح سياحه مش شغل وعندك باقى الدول وانت طالع فوق
اقولك انا بقى اشمعنى اسرائيل الى عايز اروحها بالذات اولا لو معايا خمسميت جنيه ولا 1000 جنيه ممكن اسافر لآسرائيل ولو رحت هناك هشتغل وهلاقى شغل دا غير ان هما هيعاملونى كبنى أدم هيعاملونى على اساس انى انسان
دا غير ان اساسا فى معاهدات سلام بينك وبينهم فى كمان علاقات سياسيه ودبلوماسيه فى عندك اقتصادر تجاره استيراد وتصدير
تعالى انت بقى وقولى ان اسرائيل هتشغلك جاسوس ولا هتخليك عميل ليهم او ان دا امن قومى وامن مصر
هقولك انا كل دا شعارات هايفه وكلام فاضى تعالى نحسبها بالعقل مع بعض واحده واحده بلغه المنطق مش بلغه الشعارات
اولا احنا كبنى أدمين مصريين ايه هى معلوماتنا عن الحكومه او عن الجيش المصرى معلوماتنا ضعيفه جدا ودا لان احنا بنستمد معلوماتنا من وسائل الاعلام التليفزيون والنت والجرايد اليوميه واعتقد ان دا مش صعب على اى اسرائيلى مش هقولك الحكومه ولا الجيش الاسرائيلى انه يعرف المعلومات دى لا سهل على اى مواطن اسرائيلى ان هو يعرف المعلومات الى عندنا دا بالعكس ممكن يكونو عارفين معلومات اكتر مننا تانى حاجه فى فى اسرائيل اكتر من 36 الف مواطن مصرى فى اسرائيل هل تعتقد ان اسرائيل هتجند العدد دا كله مع العلم ان قوه الجهاز المخابرات مبتعتمدش على كميه الجواسيس لا بتعتمد على قوه المعلومات الى بيحملها الشخص يعنى اسرائيل كفيله ان هى تجند 3 او 4 افراد يجيبو معلومات اكيده مش هتجند 36 الف واحد طبعا هتقولى ان الى بين الحكومه وبين اسرائيل مصالح وانا هقولك عايز اسافر اسرائيل علشان مصالح بردو هروح هناك اعمل معاهم شغل بزنس يعنى هشتغل هقضى عمل معين فى اى مكان فرن محل فى مصنع هشتغل زبال اى ان كان المهنه وفى المقابل هاخد فلوس واعتقد ان هما هيقدرونا على قد تعبك هتاخد فلوس
تعالى انت وقولى متسافرش واقعد فى بلدك ولا هترفعلى الشعارات الخايبه وتقولى مصر هى امى ونيلها هو دمى وتعملى فيها مواطن مين الى بيرفع الشعارات ديه الحكومه اكيد طيب ايه هو موقف الحكومه معانا مش عايزنا نسافر طيب ياعم يوفرولنا شغل مناسب مش طالبين اكتر من كدا ولا عايزين نشتغل فى الخارجيه ولا نركب عربيات ولا نسكن عالنيل ولا نمتلك شاليهات ولا ياختات عايزين ابسط حقوقنا مش اكتر دا غير ان مافيش شغل فى البلد اساسا وحتى لو لقيت شغل بيكون شغل استعباد دا حتى رحنا العاشر الى هى العاشر الى الواحد كان اخر حاجه يفكر ان هو يشتغل فيها ودا بعد اليأس طبعا الى الواحد وصلو بعد عناء نروح العاشر يقولو مابناخدش مؤهلات عليا يعنى رضينا بالهم والهم مش راضى بينا بمعنى اصح
والشركات الى بتقبل وفيها وظايف تلاقى شغل 12 ساعه تشتغل زى الحمار وتاخد فى الاخر 300 جنيه وتشتغل عامل زى اى حد انا ياجماعه مش عايز اشتغل على مكاتب ولا حاجه لا سمح الله زى ما فى البيت معتقدين عندى بيقولولى انت الى مش عايز تشتغل انت الى عايز تنام فى البيت او تقعد على مكتب الناس مفكره كدا لا انا عندى استعداد انى اشتغل فى شركه زباله اشتغل زبال واشيل الزباله من الشارع الشغل مش عيب بس اهم حاجه يكون فى مقابل لتعبى لكن مين بيقدر ولا هتقول لمين المستثمر طبعا بيمص دم المواطن المصرى لما بتروح الشغل اكنك رايح تتبرع بدم كل يوم تتبرع بحقنه لحد مادمك يتصفى ومايبقاش فيك حيل تقف ولا تمشى وفى الاخر يرميك فى الشارع ويشوف غيرك طيب دا عدل طيب قولى هنعمل ايه فى العيشه الى احنا عايشنها وفى الحكومه والفساد والظلم الى احنا فيه ولا علام بنتعلم ولا اكل نظيف بناكل ولا مايه نظيفه بنشرب ولا اى حاجه ولا علاج حتى الدوا الى بناخده كمان بقى مضروب كله والاعلام بتاعنا بس محدش سامعلنا ولا حد بيسأل فى حد ولا حد مهتم خالص علشان بقينا فى زمن الى بيحكمنا شويه خونه ومنافقين وشويه حراميه وبيدي الاعلام المايك للفاسقين والعاهرات تلاقى فى برنامج عاهره شو الى بييجى على قناه مسخره سينما شويه عاهرات قاعدين بيتكلمو ويقولو الحجاب راجع للتخلف والى تقولك عايزين نبيح الجنس علشان الممنوع مرغوب وتلاقى واحده عاهره مختله عقليا مريضه نفسيازى نوال السعداوى تطلع تخرف فى الدين وتتكلم بكل جهل وحماقه والاعلام يديلها الفرصه انها تتكلم وتقول رأيها ويدولها الفرصه انها تشتهر مقابل ايه طيب ياجماعه لما نعيش فى زمن فيه الخاين بيأمنوه والامين بيخونوه والكداب بيصدقوه والصادق بيكدبوه يبقى نعمل ايه طيب
اوعو تكونو مفكرين ان الواحد علشان عايز يسافر لاسرائيل ان هو اقل وطنه ولا ان هو مبيحبش بلدو ولا حاجه لا دا بالعكس احنا وطنيين اكتر من اى حد لو حصلت حرب فى مصر دلوقتى زى ماحصل فى لبنان والعراق وفلسطين وكدا اول ناس بتهرب من البلد وبتسبها الفنانين والمشاهير والمطربين والوزراء والروؤساء والعالم الاغنيه اول ناس بيسيبو بلدهم وبيهربو لكن احنا لا مش هنهرب لان مصر مش بالنسبالنا بلد ولا وطن ولا مجرد ارض ولا مكان عايشين فيه لا لان مصر بالنسبالنا اهل ابويا وامى واخواتى وخلانى وعمامى وصحابى وجيرانى واهلهم وصحابهم وجيرانهم وخيلانهم وعمامهم مصر بالنسبالنا حاجه كبيره جدا
بس المشكله فى شويه النصابين والغافلين الى مفكرين ان ربنا سبحانه وتعالى غافل عن الى هما بيعملوه لا ياجماعه ربنا سبحانه وتعالى له فى ذلك حكم والله اعلم ورسوله زى ماشفنا طبعا الازمه الاقتصاديه وانفلوانزا الطيور والخنازير والمشاكل الى عماله تحصل ورغم كل دا ماحدش بيتعظ ولا حتى بياخد بعين الاعتبار تلاقى الفساد فى كل مكان وفى كل مصلحه ومؤسسه فى البلد
فى كل مكان فى المرور وفى الشرطه وفى الحكم وفى اتخاذ القرارات وفى البزنس وفى التجاره وفى كل مكان فى اى حته فى مصر تلاقى فى فساد ومحدش مهتم ولا حد بيسأل نعمل احنا ايه ياجماعه نقعد فى البلد ولا نمشى منها وحتى كمان مش راضينا نمشى منها عاملين زى الست الى حبست قطه ودخلت النار فلا هى اطعمتها ولا هى تركتها تأكل من خشاش الارض
الحكومه عامله معانا كدا ولا هما بيأكلونا ولا هما حتى سايبنا نمشى من البلد ونشوف مكان تانى لا سايبنا هنا عبيد سواء عشنا فى مصر او خرجنا منها بردو عبيد فى كل مكان ومش عايز حد يرفعلى شعار الوطنيه والرجوله فى الحوار دا ويقولى المصرى احسن من اى حد
لا مش احسن من اى حد بنطلع بره ولا لينا اى لزمه ولا لينا اى ديه فى اى مكان لو مت فى اى مكان ولا حد اعتقلك ولا عذبك ولا ليك اى لزمه العالم كله بيعاملونا على اساس ان احنا جرب كلاب طيب دا برا مصر طيب وايه النظام داخل مصر النظام داخل مصر بردو جرب وكلاب وعبيد عند اى اجنبى حتى لو ليبى او سعودى جوا مصر بييجى هنا يهينك ويبهدلك ومابتقدرش تتكلم نص كلمه دا فى السياحه وحتى فى الشغل باعو المصانع كلها للاجانب واحنا نشتغل عندهم فى بلدنا وبردو يتحكمو فينا حتى فى التسهيلات والخدمات
انا دخلت هيئه التنميه والاستثمار الصناعى مع واحد سعودى صاحبى
قولتلو ادخل انت لوحدك اكنى معرفكش وانا ادخل لوحدى وكل واحد يتكلم ان هو هياخد ارض فى اى مدينه صناعيه يعملها مشروع
انا وانا واقف على الباب قالولى هو حاليا مفيش اراضى ولو فى اراضى بتيجى تقدم ورئك وتدفع فلوسها وتاخدها واعفاء من الضرايب خمس سنين ويالا نفض لنفسك امشى لما يكون فى اراضى ابقى تعالى
صاحبى السعودى دخل طبعا عالمكتب وقعد شرب الليمون وولع سجاره والموظفين ياباشا ويابيه وحضرتك والارض موجوده اختار فى اى مكان انت عايزه ولو مش معاك تدفع احنا ممكن نقسطلك الارض كمان واعفاء ضريبى عشر سنين واعفاء جمركى كمان لو فى مواد خام او ماكن هتستورده اعفاء جمركى دا غير الخدمات والتسهيلات الى هنقدمهالك زى الكهرباء والمايه والعماله وكل دا طيب دا كلام ياجماعه انا المصرى ولا الاجنبى يبقى الحكومه هى الى بتعاملنا كدا ويقولولك
تشجيع الاستثمار وخريجين الشباب والمشاريع وكل القوانين بتنص على صالح الاجانب وصالح الاغنياء فقط المهم وانا نازل من فوق لقيت هيئه الاستثمارات الزراعيه قولت اسأل اخد خلفيه ياجماعه عايز حتت ارض عشر فدادين ولا حاجه ازرعهم قالولى انت تروح تاخد اى حتت ارض تعجبك فى الصحراء وتزرعها وبعدين تجيلنا احنا نسجلها بأسمك وتدفع تمنها قولت للموظف طيب دا كلام يدخل العقل اى واحد ييجى بعد لما اتعب فى الارض وازرعها ييجى ياخدها منى ويقولى دى ارضى و الحكومه تاخدها منى ومش بعيد تحبسنى وتقولى انت سرقت الارض من الدوله قالى حضرتك هوا دا القانون الاراضى قانون وضع اليد تاخد الارض وضع يد والموظف بيقولى الكلام وهو مش مقتنع اصلا بالى بيقولو
طيب دا كلام ناس عاقلين لما الحكومه مفكره ان هما اذكياء وان هما بيبحثو كل حاجه وبيحلو اى مشكله طيب ميحلو مشاكلنا لا هيحلو مشاكلنا ازاى طيب دا حتى مشكله رغيف العيش الى هى مشكله كانت هايفه الحكومه عجزت ومقدرتش تحلها يبقى هتعرف تحل ايه ولا ايه
ياجماعه احنا عايزين رجاله تحكمنا مش يتحكمو فينا بس هنعمل ايه طيب كل الى نقدر نقولو حسبنا الله ونعم الوكيل واقول لكل ظالم متفكرش ربنا سبحانه وتعالى غافل عن الى انت بتعمله لا دا هو له فى ذلك حكم ياعم سيبونا نطفش من البلد هنسيبهالكو وهنريحكم مننا ولا هنقولكم بطاله ولا مشكله سكانيه ولا هنقولكم حقوقنا ولا هنقولكم اى حاجه

Unknown said...

يلعن ابوهم اولاد كلب ايه اللى انا بسمعوا ده اسرائيل ايه دول قتلة الانبياء افيقوا بقى يلعن ابو التخلف اللى احنا فيه كل واحد عايز ينام مع بنات ويكون فى جيبه قرشين حيتفلسف فيها ويقولى بلد ديمقراطى وبلد مش عارف ايه عليه العوض ومنه العوض

who@why said...

ست ابوها..في معاهدة سلام اقامتها الدوله المصريه الي انتي منتميه ليها و لاء؟طيب مش لازم المواطن يحترم معاهدات بلده؟ طيب ليه بقا المزايده علي ناس الله اعلم بظروفهم؟ليه نزايد علي مواقف ناس بتشتغل و بتسعي للنجاح؟مش بدل المزايده تحنرمي معاهدات بلدك،،اخوكي محسن الغير جاسوس مصري مقيم بام الدنيا إسرائيل