Friday, June 1, 2007

اسكندرية وووووووووو بس















فى اول بوست ليا حبيت اكتب عن حاجة بعشقها اوى وهى مدينتى عروسة البحر اسكندرية وما ادرك ما الاسكندرية مش زى مابيقول القاهريين عنا ميه مالحة ووشوش كالحة لا دا اسكندرية يعنى الدم الخفيف واحلى ناااااس ساعات بتخيل لو عشت فى حتة تانية غيرها هعيش ازاى

اولا ازاى مركبش كل يوم السلحفة الزرقاء الاسم الحركى للترام او خلينا نقولوها بالاسكندرانى تروماى ويمشى يتمختر بقى وحده وحده لما بيكون الواحد مستعجل بيبقى عاوز ينزل يزوقه او ينزل السواق ويسوق هوا وميوقفش فى المحطات بس بقى يا سلام وانتى ماوركش حاجة وخدته من فكتوريا لمحطة الرمل وتقعد جمب الشباك هتتفرج على خلطة سكانية عجيبة ومناطق شعبية جمب مناطق نضيفة وياسلام بقى لو ربنا قدرك وكملت بالترام الصفرة لحد بحرى هتتفرج على اسكندرية بجد

ثانيا ازاى اعيش من غير البحر والتمشية على الكورنيش وانك مهما لفيت هينتهى بيك المشوار عند البحر ولو حبيت تكمل اضرب غطس فى البحر وكاتش يمين وكاتش شمال تلاقى نفسك فى اليونان واحلى حاجة لما تكون زهقان وقرفان وتروح تقعد على الكورنيش وتبص للبحر والسماء وتشوف المراكب من بعيد وفى اخر القعدة تلاقى وشك عليه اليود وبقى مملح وتضطر ترجع بيتكوا تستحمي

ساعات بفكر كتير وانا ببص للبحر هوا فى عروسة بحر بجد يعنى ممكن هوب مرة واحدة الاقيها قدامى اكيد ساعتها يا هطوب ساكتة فى مكانى يا صرخ واقول يا ناس يا هوااااااا عروسة بحر الحق يا جدع ساعتها هيقولوا مين المجنونة دى هههههههه

ويااااااااااااااااسلام بقى لو اتمشيت على البحر والدنيا بتشتى وفى عز نوه طبعا لو عملت كده تبقى مجنون بس بجد بيبقى احساس حلو اوى وانت عامل زى الكتكوت المبلول وكمان تبقى امك دعيالك لو جت موجة عالية وطشت فيك بالمرة يبقى ضمنت يا حلو التهاب رئوي

السؤال بقى افطن افطن فى حتة تانية فيها كده؟

انا عن نفسى معرفش بس انا مخرجتش بره اسكندرية غير مرتين كانوا رحلات للقاهرة يوم واحد سده رده يعنى وكان احساسى ساعتها انى ممكن ادفع نص عمرى وارجع اسكندرية تانى كنت حسة بغربة الجو غريب والناس اغرب

فى اسكندرية تمشى فى الشارع تحس ان الناس دمها خفيف كلهم حركة وحيوية وبيلبسوا الوان كتير وفاقعة خصوصا البنات ريحة الجو يود من البحر تحس ان البلد مفتوحة لان البحر ملهوش اخر بتبقى عاوز تعرف الناحية التانية فيها ايه

فى القاهرة الناس( زى ماشوفت ودا رأى الخاص)مكشرين لبسهم كئيب وتحس انهم خانقة مبيدوش وياخدوا فى الكلام والجو اكئب وزى مايكون فى ترابه او مغيم يمكن عشان السحابة السودة اللى بيقولوا عنها ومع احترامى للنيل مش شايفة انه فيه سحر يعنى تبص منه تلاقى الناحية التانية والميه معكرة بلد مقفولة تتوه فيهااااااااا عشااااان كده بتوع القاهرة بيهجموا علينا فى الصيف وهيموتوا ويعيشوا هنا

ياريت مكونش تقلت عليكوا انا حبيت اتكلم بس عن معشوقتى للابد

http://www.alex4all.com/واللى عاوز يعرف اخبار اسكندرية دا اللينك بتاع الموقع الرسمى لسكندرية

ودى احسن مدونة شوفتها بتكلم عن اسكندرية http://eskandaranaya.blogspot.com/

ودى بقى مدونة عن مسقط رأسي باكوس (جمهورية الصين الشعبية)http://baccus-city.blogspot.com/index.html
امضاء
عاشقة الاسكندرية

14 comments:

Amr Abdulghany said...

كلام جميل
و على فكرة أنا معاكي في كل اللي لنتي قلتيه عن القاهرة
على فكرة أنا مارحتهاش غير مرتين بس في حياتي
مرة عشان معرض الكتاب
و مرة عشان كنت بعمل دراسة تبع الكلية
و المرة التانيه دي خصوصا فلوسي ضاعت و قعدت في مسجد عمرو بن العاص يوم كامل لغاية ما حد جالي من اسكندرية عشان ياخدني
فلكي ان تتخيلي انا بكره القاهره قد ايه
بس بدايه تمام
الله ينور
منتظر الكلام الجديد
و عايزك تقولي لي ايه رايك في اللي كتبته
رايك يهمني
و اوعي تنسي
تعيش باكوس حرة مستقلة

Amr Abdulghany said...

و نسيت اقول لك ان شرف لي اني اكون اول واحد ابعت لك رد

محمود على said...
This comment has been removed by the author.
محمود على said...

اسكندريه
اجمل بلد
احلي بحر
اجدع جو
عشقي وحبي وحياتي وحلمي
انا بحب اسكندريه
ومبروك عليكي وعلينا المدونه يا سكندرنيه

Alexandrian far away said...

أهلا وسهلا ببنات أسكندريه
بجد حبك للأسكندريه يشرح القلب
ويفرح
نورتي المدونات

ست ابوها said...

شكرا يا باكوسي على مرورك على المدونة وانك اول واحد استجبت للنداء الالى ومستنين جديدك فى مدونتك وانا متابعها
تعيش باكوس حرة مستقلة

ست ابوها said...

الله يبارك فيك وشكرا على الكلام الحلو يا استاذ محمود

ست ابوها said...

Alexandrian far awayدا نورك وربنا يخليك اسكندرية تتحب كده لله فى لله الواحد بيتولد بيحبها من غير ليه على رأى عبد الوهاب

وجع دماغ said...

مادام أنتى أسكندرانية
لازم نشجعك لحد المدونة ما تقف على رجليها وصيتها يغزو الأفاق
حلوة الأفاق دى!!!
عموما مبروك حاولى تكتبى بأستمرار
وربنا يوفقك

ست ابوها said...

ربنا يكرمك وهما دول الاسكندرنية الجدعان اللى بيشجعوا بعض ويقفوا جمب بعض وشكر على مرورك على المدونة و المدونتين بتوعك حلوين اوى بس ياريت تزود المقالات فى مدونة الجورنالجى

ما علينا said...

مش هاعارضك
انا عن نفسي زرت اسكندرية مرتين بس
وابصم بالعشرة انها عروسة فعلا
ودايما اقول فعلا اسكندرية ماريا
واجمل كلام ووصف ليها
هو تتر مسلسل زيزنيا
بلد جميلة فعلا بكل اللي فيها
اماكن وناس
والترام فعلا ركوبه اذيذ جدا

القاهرة بقى زرتها كتير جدا
خنقة فعلا
بس النيل جميل وله سحره
صحيح بتشوفي الناحية التانية منه
لكن لو وسعت المدى لخيالك زيادة
قكري منبعه فين
وبيمر على ناس اشكال والوان
وجبال وخضرة

وناس القاهرة مش طابعهم الغالب هو الكآبه لعلمك غالبيتهم ظراف جدا
بس لما تفتحي معاهم حوارات
وفيهم كتير جدعان
بس لهم عذرهم البلد زحمة


وبعيدا عن كل دا
كل انسان بيحب مكانه وبيرتبط بيه
خاصة لما تكون في كل ذكرياته

انا عن نفسي
باعشق مدينتي الصغيرة جدا
التابعة لاحدى محافظات الاقاليم
ولا ابادل الحياة فيها بحياة في القاهرة او الاسكندرية

هاجيب منين ذكريات في اي من المدينتين
كل ذكرياتي فيها

احييك على حبك لبلدك

اسكندراني اوي said...

حلوه
بوست جميل قلتي فيه كتييييييييير اوي من اللي عاوزين نقوله عن اسكندريه
وان كنت فاكر اني عملت انجاز وعملت بلوج عن اسكندريه
دا طلع في بلوجات تحفه وانا مش واخد بالي
بالرغم اني بقالي اكتر من سنه قلرئ مدونات وعشر ايام بس مدون
الا اني فعلا معترتش في اي حاجه عن اسكندريه
بس بجد بجد
بلوجك جميييل
اوي

captsho said...

انا بحيكى على الكلام الرائع دة
بس جميل اننا نتكلم ونوصف بس الاجاننا ازاى نحقق الاهداف دى وربنا يوفقك وانتى كلامك هايل ومواضيعك كلها فيها جدية قوى وياريت متحرميناش من مواضيعك الجميلة دى
عاشق لم يعشق

AoLaAoL said...

بوست جميييل واسكندرانى...بجد البلد دى انا متعصب لها لأبعد حدود واللى يقول غير كده نقطعوه ونرموه للسمك D: